مقدمة لكتاب اصبح مدونة .. 1

مش عارف ليه دايما لما بقرا كلمة مقدمة بكون عاوز اقلب في الكتاب اللي في ايديا بغريزية عشان افهم انا (بنفسي) المقدمة بتتكلم علي ايه  ..
فانا من حزب (لا مقدمة و ادخل ف الموضوع) ..!
و اللي خلاني اكتب شبه المقدمة دي للمدونة .. عشان بس عاوزك تعرف ان التدوينات اتكبتت في مراحل سنية مختلفة .. و في اوقات و مراحل مختلفة و كنت ناوي اعملها كتاب .. بس حسيت ان نشر الافكار و التجربة الشخصية دي .. هو افضل الطرق الآن .. 
فأعتبر بقي ان المدونة دي كإنك بتقرا كتاب ..
و متاخدش ف بالك لو ذكرت في السياق انها كتاب ..
و دي الفصول بتاعته .. اقراها .. و لو لقيت اي استفسار او تساؤل حكون مرحب بيك جدا..
ندخل بقي في المدونة .. قبل ما تفر في الكتاب ..

* *
1
* *

الكتاب ده خلاصة تفكير متعمق فينا ..

 إحنا البشر .. و علاقتنا بالدين .. متعمق في الخلافات و الاختلافات اللي حوالينا ..

 متعمق في الشر و الخير .. الثواب و العقاب .. الوجود .. و الغير موجود ..

الكتاب اللي بين ايديك ده مجرد تفكير إنسان .. .. عاش و إتأمل  .. و عشان هو مجرد تفكير إنسان .. فمهواش مرجع ديني و لا مرجع أخلاقي و لا فيه سر الكون .. بس فيه كلام كتير كنت بدور لإجابه عليه .. هو رحلة انا اخدتها مع نفسي و قطعت اشواط فيها كتيرة .. الرحلة دي مكنتش في أماكن جديدة و لا قابلت ناس جديدة .. و رحلتي دي كانت في عقلي .. كانت في الشواهد اللي حواليا .. اللي بمر بيها كل يوم .. و مسألتش نفسي هي عبارة عن ايه و لا موجودة ليه ..!!؟؟

 و في يوم لما زادت عليا الأسئلة و ملقتش اجوبة ..هي جاوبتني.. كل الفكرة إني كونت خواطر و أفكار أخدت مني وقت كبير لحد ما خرجت بالمنظر ده .. حسب ما انا إعتبرتها منطقية ..و المشترك فيها وحده العقل .. مش حقوللك الدين او غيره ..

كنت بفتكر زمان ان فيه حاجات الواحد ما يسألش فيها .. عشان غلط إنه يسأل عنها و إنه يبقي كفر و حرام .. و بعد كده حسيت ان الكلام ده مش صح .. لازم اسأل و أجمع معرفه و أفكر .. امال انا ليا عقل ليه مثلاً ؟ و مش لازم عشان مش شايف الحاجة ملموسة و مادية قدامي يبقي ده تفكير منطقي ..لكن التفكير العلمي و المنطقي مبني في الأساس علي شواهد .. بناء فروض .. و إختبار الفروض دي .. مش عاوز اخلي الموضوع معقد .. بس عاوزك تفكر .. بشكل مختلف .. و عاوزك من جواك تفكر و تفكر .. عشان إنتا لو مفكرتش .. عقلك بيفكر  من غير ما تحس ..!! خليك عارف بس انه مش لازم يكون نهاية التفكير ده الحل النهائي للي بتفكر فيه ..!! و لولا كده مكنش حد فكر .. و عملية التفكير مستمرة .. و مش حتنقطع إلا بنهاية الإنسان نفسه ..

و مش شرط تكون الاستنتاجات اللي وصلتلها هي إستنتاجات صحيحه او لا تقبل الجدل .. بس كل الفكرة ان مفيش حاجة صحيحة من اولها لآخرها و لا حاجة غلط من أولها لآخرها برده .. الصح و الغلط شئ نسبي .. الصح فيه جزء غلط و الغلط فيه جزء صح ..و من هنا اقدر اقولك اني مسكت طرف خيط لمدخل الكتاب .. إن مفيش حاجة كلها بيضاء و لا حاجة كلها سوداء .. حتي جواك انتا برده كده.. النفس البشرية جواها الابيض و جواها الأسود .. الصح و الغلط .. النقيضين مع بعض .. عاملين زي كف الميزان .. كفة فيها الخير .. و كفة فيها الشر .. لو إقتنعت بده .. يبقي انت وفرت عليا حاجات كتيرة.

 زمان و انا صغير كنت مفكر الوحش بيتولد وحش و الطيب بيتولد طيب .. و انه لازم يكون فيه صراع ما بين الراجل الطيب و الراجل الوحش و لازم الطيب هو اللي ينتصر .. و في الافلام الامريكاني كان ساعات الراجل الوحش هو اللي بينتصر .. و مكنتش بحاول اعرف هو الطيب ده كان عالطول طيب ؟ و الوحش ده كان دايماً وحش ؟ و لا يعني ايه مفهوم طيب ؟ و لا يعني ايه مفهوم وحش ؟ تقريباً طيب او وحش دي مسارات إحنا بنحطها .. و اللي بيمشي في واحد منها بنقول عليه طيب او وحش .. يعني العملية نسبية في الأساس برده بالنسبة لنا..!

اكتر حاجة كانت بتلفت نظري و انا بطلع بطاقة الرقم القومي , هي كلمة مسلم ..!! مش عاوزك تستغرب .. إحنا بتتكتب دياتنا علي البطاقة من ديانتا اللي مكتوبة في شهادة الميلاد .. و بالتالي .. انت بقيت مسلم .. او مسيحي .. او اي ديانة تانية .. علي الورق اكيد لازم يتحطلك دين .. لكن من جواك الموضوع عامل إزاي ؟؟ ياريت منكونش إختارنا دينا علي غرار (هذا ما وجدنا عليه اباؤنا) ..!! و متنساش اني مش بطرح اسئلة , انا عمري ما كنت  رجل دين .. مع إني ليا تحفظ علي تسميه {رجل دين} نفسها , بحس ان الدين إقتصر علي بعض الرجال فقط .. و الدين إتخلق للكل مش للبعض .. ممكن يكون فيه ناس تأملت و تبحرت اكتر من ناس تانية بس المهم انها تكون شغلت (دماغها) مش (حافظ مش فاهم) .. عشان كده بحبذ تسمية {بحار في علوم الدين} .. حتي مش {عالم دين} !!

اكتر حاجة ميزت الإنسان من بدء الخليقة انه مخلوق إجتماعي .. و إنه دايما بيدور علي دين له.. لازم يعبد إله .. يعني لازم تتكتبلك حاجة في البطاقة من ورا .. عشان متبقاش مختلف عن الآخريين.. و حتي اللي مش بيؤمنوا بوجود إله من الأساس بيعتبروا ان ده دينهم ...!! و لو تعمقنا في الموضوع ده .. حتلاقي إن الإنسان بطبيعته عارف انه مخلوق .. و عارف ان فيه حد هو اللي خلق كل حاجة حواليه .. عشان كده منستغربش من اسئلة الأطفال ساعات لما بيسألو ابائهم (إحنا جينا إزاي ..؟؟!!) و عشان عندنا عقل لازم تسأل نفسك مين صاحب الحاجات دي ..؟ فبندور علي اللي يشبع رغبته في الأسئلة دي .. و من هنا إنحدرت آلاف الأساطير  و القصص و الحكايات .. و عشان كده اللي ملهوش دين بيدور علي دين .. حتي و لو هو علي دين .. بيدور علي دين..!! طبيعة الإنسان كده انه بيدور علي حاجة يعبدها..!! و ده مش كلامي .. ده إجماع علماء الإجتماع علي كده.
\